ලොව පවතින අනර්ඝත ම සොයාගැනීම් වලින් එකක් ලෙස “සෙලියුලර් දුරකථනය” හෙවත් “ජංගම දුරකථනය” හැදින්විය හැකි ය. එය ගැන කිසිදු වාද විවාදයක් නොමැත. මෙය විශේෂයෙන් ම දුරකථන පණිවිඩ යැවීමට හා කෙටි පණිවිඩ (එස්. එම්. එස්.) යැවීමට වැඩි වශයෙන් භාවිතා කරයි. “විද්‍යුත් වුම්බක වර්ණාවලියේ” (Electro-Magnetic Spectrum) එන “රේඩියෝ තරංග” මේ සඳහා භාවිතා කරයි. වර්තමාන තාරුණ්‍යය සෙලියුලර් දුරකථන, විශේෂයෙන් ම ආභරණයක් ලෙස ද භාවිතා කරයි. අප රටේ නූගතුන් හෙවත් මන්ද බුද්ධික ජනතාව අතර සෙලියුලර් දුරකථන උන්මාදයක් පවතී යැයි මම පැවසුවහොත්; එම උන්මාදයෙන් පෙළෙන අය හැර, ඔබ බොහෝ දෙනා මා හා එකඟවනු ඇතැයි මම සිතමි. කෙසේ වෙතත් මම මේ ලියන්නට යන්නේ එම උන්මාදය ගැන නම් නොවේ.
.
සෙලියුලර් දුරකථනයක් තුල ප‍්‍රබල විද්‍යුත් චුම්බක තරංග “ග‍්‍රාහකයක්” (detector) හා ප‍්‍රබල විද්‍යුත් චුම්බක තරංග “ප‍්‍රභවයක්” (source/antenna) අන්තර්ගත ය. එය කෙතරම් ප‍්‍රබල විය යුතුදැයි පැවසුවහොත්, එමගින් දුරකථනය තිබෙන ස්ථානයේ සිට, එයට කිලෝමීටර කිහිපයක් ඈතින් පිහිටි දුරකථන කුළුණ වෙත සංඥාවක් යැවීමට හැකි විය යුතු ය. මේ සඳහා සැලකිය යුතු “වොට්” ප‍්‍රමාණයකින් යුත් “ජවයක්” (power) අවශ්‍ය වෙයි. මෙම ක්‍රියාවලිය දුරකථන ඇමතුම පවතින සම්පුර්ණ කාල පරාසය තුලදීම සිදුවිය යුතු ය. එනම් ඔබ දුරකතනයෙන් කතා කරන සියළු කරුණු දුරකථන කුළුණ වෙත යොමු කලයුත්තේ ඔබගේ දුරකතනයේ පවතින “ප‍්‍රභවය” යි. මෙම සම්පුර්ණ කාලය තුළ, අප සෙලියුලර් දුරකථනය අපගේ කණට ස්පර්ශ කර තබාගන්නා බැවින්, එම නිපදවන ජවය නිසා මොලයේ සෛල වලට ද හානි සිදුවිය හැකි ය. නමුත් තවමත් මේ සඳහා අපට ස්ථීරව පැවසීමට තරම් විද්‍යාත්මක පරියේෂණ ප්‍රතිඵල නොමැති බව මම ද විශ්වාස කරමි. එහෙත් කිසියම් හානියක් සිදුවීමට ඉතා ඉහල අවධානමක් පවතින බව නම්, භෞතික විද්‍යා විෂය පිළිබද සුළු හෝ අවබෝධයක් ඇති කෙනෙකුට වුව ද වැටහිය යුතු ය.
.
මෙම පරියේෂණ ප්‍රතිඵල නුදුරු අනාගතයේ දී අපට ඇසිය හැකිවේවි. නමුත් ඒ වනවිට, අපගේ තරුණ පරපුර සීඝ‍්‍රයෙන් එම අවධානමට අසුවී තිබිය හැකි ය. නිතර නිතර දුරකථන ඇමතුම් ලබා ගන්නා උදවිය, නිතරම තම සෙලියුලර් දුරකථනය තම කණට ස්පර්ශව තබා ගනිති. මෙම තත්ත්වයට අපගේ තරුණ පෙම්වතුන් හා පෙම්වතියන් වැඩිපුරම භාජනය වී ඇත. එය ඔවුනගේ මානසික සෛල වල විකෘතිවීම් වලට හා සෛල විනාශයට බලපානු ඇත. නමුත් මෙසේ කරනුයේ බොහොවිට “මොලයක් නොමැති” පිරිස් බවින්, සමහර විට ඔවුනගේ විනාශවීමට තරම් වැදගත් සෛල මොලයේ නොතිබෙනවා ද විය හැකි ය. එහෙත් අපගේ රටේ අනාගතය භාර ගැණීමට සිටින තරුණ තරුණියන් ගේ අනාගත සෞඛ්‍ය තත්ත්වය කෙසේ වේවි දැයි කාට නම් පැවසිය හැකි ද? නමුත් ඔබ බුද්ධිමත් නම් කල යුත්තේ හැකිතරම් එම අවධානමට අඩුවෙන් මුහුණදීමයි. විශේෂයෙන් ම දුරකථන ඇමතුම ගනු ලබන මොහොතේ දී ඔබගේ දුරකථනය ඉතා ප්රභල විද්‍යුත් චුම්බක සංඥා පිටකරන බැවින් එම ආරම්භක මොහොතේ සෙලියුලර් දුරකථනය ඔබගේ කනට ඈතින් තබා ගැනීම වඩා සුදුසු ය. එමෙන් ම ඔබ දීර්ඝ ඇමතුම් ලබා ගන්නේ නම්, දිග වයරයක් සහිත ඉයර්ෆෝනයක් භාවිතා කිරීම වඩා සුදුසු ය. (තවද බ්ලුටුත් තාක්ෂණයෙන් ක්‍රියාකරන ඉයර්ෆෝනයක් භාවිතා කිරීම ද වඩා සුදුසු ය; එයට හේතුව බ්ලුටුත් තාක්ෂණයෙදී භාවිතා කරනුයේ “ක්‍ෂුද්‍ර තරංග” (micro-waves) වන අතර ඒවා මොලයේ සෛල වලට හානිදායක වන නමුත්, මෙම තාක්ෂනය සඳහා “ඉතා දුර්වල” ක්‍ෂුද්‍ර තරංග භාවිතා කරන බැවින් එහි හානිය අවම ය. නමුත් ඔබ සෙලියුලර් දුරකථන හා බ්ලුටුත් ඉයර්ෆෝනය ඔබගේ ඔලුවේ එක පැත්තකින් පමණක් තබා ගත යුතු බව ද අවධාරණය කරමි. එම සෙලියුලර් දුරකථන හා බ්ලුටුත් ඉයර්ෆෝනය යන දෙක ඔලුව දෙපස තබා ගැනීම නුසුදුසු ය)
.
එමෙන් ම සෙලියුලර් දුරකථන කුළුණු රට හැම තැනකම ඉදිවී තිබෙනු ඔබ අපට දක්නට හැකි ය. ජනාශූන්‍ය ප‍්‍රදේශවල මෙවැනි දුරකථන කුළුණු තිබුනාට කම් නැත. එහෙත් මිනිසුන් බහුලව ජීවත්වන ප‍්‍රදේශවල ද, දැන් මෙම දුරකථන කුළුණු බහුලව දැකිය හැකි ය. එම කුළුණු ආශ‍්‍රිතව වෙසෙන ජනයාගේ සෞඛ්‍යය තත්ත්වයට, ඒවා විශාල තර්ජනයක් විය හැකි බව මගේ අදහසයි. මක් නිසාද යත්, ඒවායේ ඇති, අති-ප්රභල විද්‍යුත් චුම්බක තරංග ග‍්‍රාහකයක් හා අති-ප්රභල විද්‍යුත් චුම්බක තරංග ප‍්‍රභවයන් නිසාවෙනි. මේවායෙන් පිටකරන හා පිටවන ප්රභල විකිරණ නිසා, මිනිසුන්ගේ විශේෂයෙන් ම මොළයේ සෛල විනාශ වීමට වැඩි හැකියාවක් ඇති බව කිව යුතු ය. එය භයානක තත්ත්වයකි. තව ඉදිරියේ දී මේ සම්බන්ධ නව නීතිරීති පවා සම්පාදනය වෙනු ඇතැයි මම තදබල ලෙස විශ්වාස කරමි. නමුත් තවම අප රට මෙම ව්‍යසනයට ගොදුරු වී එපමණ කලක් ගත වී නොමැති බැවින්, මේ සඳහා තවත් ටික කාලයක් (වසර දහ පහළොවක්) අපට බලා සිටීමට සිදුවනු ඇත.
.
.
ආචාර්ය ප්‍රසන්න මධුරංග ප්‍රනාන්දු
ජ්‍යෙෂ්ඨ කථිකාචාර්ය,
භෞතික විද්‍යා අධ්‍යයනාංශය,
ශ්‍රී ජයවර්ධනපුර විශ්වවිද්‍යාලය.
.
Page Link :
(http://www.lakbima.lk/…/da…/2017/July/last_24_07_17/main.pdf)
(2017 ජූලි මස 24 වන අද දින ලක්බිම පුවත්පතේ 10 වන පිටුවේ පලවූ ලිපියකි)