මේ සඳහා අප මුලින්ම මුහුණදී ඇති මෙම ප්‍රශ්ණයේ වටපිටාව හදුනාගැනීම වැදගත් වේ. ඒ සඳහා සාමාන්‍ය පරිසරය ගැන හා එහි ඇති විද්‍යාත්මක සාධක ගැන ඉතා සරලව යම් අවබෝධයක් ගැනීමට අප පළමුව උතසහ කරමු. සාමාන්‍යයෙන් අප රටේ භූගෝලීය පිහිටීම අනුවල, සමකයට ආසන්නව පිහිටා ඇති රටක් නිසාවෙන් රටේ සාමාන්‍ය උෂ්ණත්වය සමකයට ඈතින් ඇති රටවලට සාපේක්ෂව තරමක් වැඩි ය. එහි මධ්‍යනය අගය ~27oC පමණ වේ. නමුත් අප රටේ භූ-විෂමතාවය අනුව විවිධ දේශගුණික කලාප පවතින බැවින්, සාමාන්‍යයෙන් වසරක් පුරා, රටේ විවිධ ප්‍රදේශවල උෂ්ණත්වය 8oC - 35oC යන උෂ්ණත්ව පරාසය තුල වෙනස් වේ. එමෙන්ම සාමාන්‍ය වැඩුණු පුරුෂයෙකුගේ ශරීර උෂ්ණත්වය ~36.7oC හෙවත් ~98.4oF බැවින් අප රට තුල සිටින කිසිම පුද්ගලයෙකුට විශේෂ තත්ත්ව වල දී හැර තම ශරීර උෂ්ණත්වයට වඩා වැඩි පරිසර උෂ්ණත්ව වලට භාජනය වීමට සිදු නොවේ. එබැවින් ම අප වාසනාවන්ත කාලගුණයක් පවතින රටක ජීවත්වන්නේ යැයි අපට සතුටු විය හැකි ය.
එහෙත්, අප සාමාන්‍යයෙන් “අද හරි රස්නෙයි නේද ?” කියා පවසන්නේ, පරිසර උෂ්ණත්වය වැඩිවීම නිසා පමණක් නොවේ. එයට ප්‍රධානම සාධකය සපයනු ලබන්නේ “වාතයේ ආර්ද්‍රතාව” යි. මෙය සරල වචන වලින් පවසතොත්, සාමාන්‍ය වාතයේ ඇති තෙත් හෝ වියලි බව වේ. වාතයේ තෙත් බව වැඩිවිට හෙවත් වියලි බව අඩුවිට අප ආර්ධතාවය වැඩි යැයි කියනු ලැබේ. තවද ආර්ද්‍රතාව වැඩිවිට, අපට දහදිය දැමුවිට ඒවා වාෂ්පවී යාමේ හැකියාව අඩු ය. මක්නිසාදයත්, පරිසරයේ තෙතමනය වැඩි බැවින්, අපගේ සම මතුපිට ඇති දහදිය බිඳු පරිසරයට වාෂ්පවී යාමට එතරම් පහසු නැත. එවිට අපට යම් අපහසුතාවයක් දැනේ. තදින් ඉර පායා ඇති දිනක අපට වැඩිපුර දහදිය දමන බැවින්, එම දහදිය පරිසරයට වාෂ්පවී යාමේ හැකියාව අඩු නිසා අපට දැනෙන අපහසුතාවය වඩා වැඩි ය. මෙවිට අප “හරි රස්නෙයි” යයි කියන්නෙමු.
එමෙන්ම, වාතයේ තෙත් බව අඩුවිට හෙවත් වියලි බව වැඩිවිට අප ආර්ද්‍රතාව අඩු යැයි කියනු ලැබේ. තවද ආර්ද්‍රතාව අඩුවිට, අපට දහදිය දැමුවිට ඒවා පරිසරයට වාෂ්පවී යාමේ හැකියාව වැඩි ය. මක්නිසාදයත්, පරිසරයේ තෙතමනය අඩු බැවින් හෙවත් පරිසරය වියලි බැවින්, අපගේ සම මතුපිට ඇති දහදිය බිඳු ඉක්මනින් පරිසරයට වාෂ්පවී යයි. එවිට අපට යම් පහසුවක් හෙවත් සිසිලසක් දැනේ. තදින් ඉර පායා ඇති දිනක අපට වැඩිපුර දහදිය දමද්දී වුව ද, එම දහදිය පරිසරයට වාෂ්පවී යාමේ හැකියාව වැඩි නිසා අපට පහසුවක් දැනේ. නමුත් පරිසරය වියලි බැවින්, අපගේ ශරීරයට වියලි බවක් දැනෙන අතර හමනා සුළඟ ද වියලි බැවින් අපට වැඩිපුර පිපාසය දැනේ.
අප රට ප්‍රධාන වශයෙන් දේශගුණික කලාප තුනකට බෙදා ඇත. ඒවා නම්, තෙත් කලාපය, වියලි කලාපය හා අතරමැදි කලාපය වශයෙනි. එය පහත ලංකා සිතියමෙන් දැක්වේ.
මෙම තෙත් කලාපය (Wet Zone) ලෙස හඳුන්වන්නේ, වාර්ෂික වර්ෂාපතනය 2500 mm ට වඩා වැඩි හා සාපේක්ෂ ආර්ද්‍රතාව 70% සිට 95% පමණ දක්වා පවතින ප්‍රදේශයයි. එමෙන්ම, අතරමැදි කලාපය (Intermediate Zone) ලෙස හඳුන්වන්නේ, වාර්ෂික වර්ෂාපතනය 2500 mm – 1750 mm අතර අගයක් ගන්නා හා සාපේක්ෂ ආර්ද්‍රතාව තෙත් හා වියලි කලාපවල අගයයන්ට අතරමැදි (නිවැරදිව කිව නොහැක) අගයක් ගන්නා ප්‍රදේශයයි. වියලි කලාපය (Dry Zone) ලෙස හඳුන්වන්නේ, වාර්ෂික වර්ෂාපතනය 1750 mm ට වඩා අඩු හා සාපේක්ෂ ආර්ද්‍රතාව 50% සිට 70% පමණ දක්වා පවතින ප්‍රදේශය යි. එබැවින් ඔබ පදිංචිව සිටින ප්‍රදේශය මත; ඔබ ජීවත්වන පරිසරයේ ආර්ද්‍රතාව අඩු අගයක් ද නැතහොත් වැඩි අගයක් ද යන්න තීරණය වේ. ඒඅනුව ම ඔබට දහදිය දැමුවිට ශරීරයට යම් අපහසුතාවයක් දැනේ ද එසේත් නොමැතිනම් පහසුවක් දැනේ ද යන්න තීරණය වේ.
වර්තමානයේ සිදුවී ඇති ප්‍රධාන කාලගුණික විපර්යාසයට මුලික ම හේතුව එම ආර්ද්‍රතාවම වන අතර එයට සුර්යයා ද කිසියම් සැලකිය යුතු අමතර බලපෑමක් සිදුකොට ඇත. පෘථිවිය, සුර්යයා වටා ඉලිප්සාකාර කක්ෂයක ගමන් කරන බව අපි දනිමු. අප එය පහසුවට අසන්න වශයෙන් වෘත්තාකර කක්ෂයක ගමන් කරන්නේ යයි සලකන අවස්ථා තිබුන ද, සත්‍ය වශයෙන්ම පෘථිවිය, සුර්යයා වටා ගමන් කරනුයේ ඉලිප්සාකාර කක්ෂයක වේ. මෙය සාපේක්ෂව බැලුවිට සුර්යයා, පෘථිවිය වටා ඉලිප්සාකාර කක්ෂයක ගමන් කරන්නේ යයි සැලකුව ද වැරදි නැත.
ඉහත රුප සටහන අනුව A හෝ B ලක්ෂ වලදී පෘථිවිය සුර්යයාට ආසන්නව ම ගමන් කරන අතර, C හෝ D ලක්ෂ වලදී පෘථිවිය සුර්යයාට ඈතින් ම ගමන් කරයි. මෙම 2016 වසරේ දී මෙලෙස පෘථිවිය සුර්යයාට ආසන්නවම ගමන් කරන කාල වකවානුව අප්‍රේල් 05 සිට අප්‍රේල් 14 දක්වා ය. එබැවින් එම කාලය තුල පොලොවට පතිතවන සුර්ය විකිරණ වල තීවුරතාව හෙවත් ප්‍රබලබව වැඩි ය.
සාමාන්‍යයෙන් අප පරිසර උෂ්ණත්වය යයි පවසනුයේ පරිසරයේ ඇති නිදහස් වායුගෝලයේ උෂ්ණත්වය වේ. කොළඹ දිස්ත්‍රික්කය සඳහා මෙය ~20oC - ~34oC ලෙස වෙනස් විය හැකි ය. ඉතාමත්ම සරල ආකාරයට පවසතොත්, මෙම උපරිම උෂ්ණත්වය හටගෙන ඇති ආකාරය මෙලෙස පැහැදිලි කල හැකි ය. සුර්යයාගෙන් පොළොවට පැමිණෙන විකිරණ හේතුවෙන් පොලොව රත් වේ. මෙම තාපය සංවහන වායු ධාරා මහින් පොලොවට ඉහලින් ඇති වායුගෝලය වෙත ගමන් කරයි. මේ හේතුවෙන්, වායුගෝල උෂ්ණත්වයේ උපරිම අගය ~34oC පමණ විය හැකි ය. නමුත් සුර්ය තාපය නිසා රත්වූ පොලොවට ඔබ අත තබා බැලුවහොත් එය වැඩිපුර රත්වී ඇති බව ඔබට දැනේ. ඉන් අදහස්වනුයේ එහි උෂ්ණත්වය ~34oC වඩා වැඩි බව යි. එයට හේතුව, තාප සංවහනයට අමතරව තාප සන්නයනය නිසා ද පොලොව සිට ඔබගේ අත වෙත ගලන තාපය නිසාවෙනි. නමුත් අප පරිසර උෂ්ණත්වය යැයි හදුන්වන්නේ එම තාප ප්‍රමාණයට අදාළ උෂ්ණත්වය නොවේ. අප වායුගෝලයේ පවතින සාමාන්‍ය සංවහන වායු ධාරා නිසා ඇතිවන උෂ්ණත්වය, පරිසර උෂ්ණත්වය වේ.
නමුත් විශේෂ තත්ත්ව යටතේ, කොළඹ දිස්ත්‍රික්කය තුල ම මෙම උෂ්ණත්වය බොහෝ සෙයින් අඩු හෝ වැඩි විය හැකි ය. නිදසුනක් ලෙස දහවල් 12:00 සිට 2:00 පමණ කාල පරාසය තුල ගිණි අව්වේ නවතා ඇති, ඇතුලත නිමැවුම් ද්‍රව්‍ය (සියලුම අසුන් කවර සහිතව) කළු පාට වන, සියලුම ජනේල වීදුරු හා දොරවල් වසා ඇති කළු හෝ එවැනි තද වර්ණයක් සහිත රථයක් ඇතුලත උෂ්ණත්වය ~80oC පමණ දක්වා ඉහල යා හැකි ය. (එයට ප්‍රධානත ම හේතුව “හරිතාගාර අචරණය” යි. විදුරුවලින් තනා ඇති ඇතුලත සාමාන්‍ය වාතය පමණක් ඇති භාජනයක් තුලට හිරු එලිය පතිත වන විට දී එය තුල උෂ්ණත්වය ඉහල යාමේ සංසිද්ධිය පැහැදිලි කරන විද්‍යාත්මක න්‍යාය හරිතාගාර අචරණය ලෙස හදුන්වනු ලැබේ. එය ද තාප විකිරණ නිසා ඇතිවන තත්ත්වයකි). තව ද දහවල් 12:00 සිට 2:00 පමණ කාල පරාසය තුල ගිණි අව්වේ තබා ඇති කළු පැහැති හෝ ඊට හුරු යකඩයක මතුපිට උෂ්ණත්වය ~50oC - ~60oC වැනි අගයයක් ගත හැකි ය. එයට හේතුව තාප සංවහනය හා තාප සන්නයනයට අමතරව, සුර්ය විකිරණ නිසා ද එම ලෝහ පෘෂ්ඨය තවත් රත්විම යි. එමෙන්ම දවල් 12:00 ට පමණ ගිණි අව්වේ තිබෙන වායු සමනය කරන ලද සංවෘත කුටියක් තුල උෂ්ණත්වය ~15oC - ~20oC පමණ අඩු විය හැකි ය. එයට හේතුව වායු සමීකරණ උපකරණයෙන් කුටිය ඇතුලත ඇති වාතයේ ආර්ද්‍රතාව අඩුකොට ඇතුලත පරිසරය සිසිල් කොට ඇති නිසා ය. සාමාන්‍යයෙන් පරිසරයේ උෂ්ණත්වය රදා පවතින්නේ පරිසරයේ තාප සංවහනය හේතුවෙන් බව අප මිට ප්‍රථම කතා කළෙමු. එබැවින් ඔබ අවට පරිසරයේ උෂ්ණත්වය වඩා වැඩි කරගැනීම ඔබ දැනුවත්ව ම හෝ නො දැනුවත්ව ම සිදුවිය හැකි ය.
දහවල් කාලයට අමතරව සාමාන්‍යයෙන් රාත්‍රී කාලයේ උෂ්ණත්වය සොබහවිකව ම අඩු අගයක් ගනී. එබැවින් රාත්‍රී කාලය තරමක් සිසිල් සොබහවයක් පෙන්නුම් කරයි. මෙය සිදුවන ආකාරය මෙලෙස පැහැදිලි කල හැකි ය. දහවල දී පොලොව මගින් උරාගන්නා ලද සුර්යය විකිරණ හේතුවෙන් පොළොවේ උෂ්ණත්වය ඉහල යන අතර එය දහවල් කාලයේ දී දිගින් දිගට ම සිදුවේ. නමුත් සුර්යයා බැස ගිය පසු පොලොව තවදුරටත් සුර්යය විකිරණ හේතුවෙන් රත්වන්නේ නැත. එවිට අහස පවතින්නේ සුර්යයාට විරුද්ධව ඇති සිසිල් විශ්වයට මුහුණ ලා බැවින් පොළොවෙන් තාපය වායුගෝලය හරහා විශ්වය වෙත මුදාහරිනු ලැබේ. එබැවින් පොලොව දිගින් දිගට ම සිසිල් වේ. පාන්දර දෙකට තුනට පමණ අවට පරිසරය උපරිම සිසිල් බවක් පෙන්වයි. නමුත් සමහර දිනවලදී, පාන්දර කාලයේ දී පවා අපට අවට පරිසරය උණුසුම් ව දැනෙන අතර ගතට දහදිය දමා දැඩි අපහසුතාවයක් ද දැනේ. එයට ප්‍රධානත ම හේතුව ලෙස පැවසිය හැක්කේ අහස වලාකුළු වලින් පිරී තිබීම ය. රාත්‍රී කාලයේ දී අහස වලාකුළු වලින් පිරි තිබෙන විට දී පොළොවෙන් විශ්වයවෙත මුදාහරිනු ලබන තාපය, අහසේ ඇති වලාකුළු වලින් පරාවර්තනය කොට, විශ්වය වෙත යාමට ඉඩ නොදී නැවත පොලොවට ම හරවා එවනු ලබයි. මෙවිට පොලොව සාමාන්‍ය ආකාරයට සිසිල් වන්නේ නැත. එවිට අපට වැඩිපුර රස්නය දැනෙන නිසා දැඩි අපහසුතාවක් දැනෙනු ඇත.
මේ කාලයේ දී හෙවත් අප්‍රේල් මාසය තුල සහ මැයි මස මුල කාල පරාසය අපට ඉහත සඳහන් සියලුම අහයපත් සාධක වලට මුහුණ දීමට සිදුවේ. එනම් සුර්යයා වෙනත් කාලවලට වඩා පෘථිවියට ආසන්නව ගමන් කරයි. ඊට අමතරව, තෙත් කලාපයේ ජීවත්වන අයට පරිසරයේ අර්ධතාවය ඉතා වැඩි බැවින් දැනෙන අපහසුතාව ඉතා වැඩි ය. එමෙන්ම, වියලි කලාපයේ ජීවත්වන අයට ද පරිසරයේ අර්ධතාවය සාපේක්ෂව අඩු අගයක් ගත්ත ද එංගලන්තය වැනි රටකදී මෙන් අඩු ම අගයක් නො ගනී. මිට අමතරව බොහෝ දිනවල දි රාත්‍රී කාලයේ අහස වලාකුළු වලින් පිරි පවතී. මෙම හේතු ප්‍රත්‍යයන් නිසා අපට දැඩි අපහසුතාවක් දැනේ. එයට අමතරව අපගේ නො දැනුවත්කම නිසා ද අප මෙම අපහසුතාවය වැඩිකර ගැනීමට යම් යම් දෑ සිදුකරනු ලබයි. ඒවා අතර ප්‍රධාන වශයෙන් මෙම කරුණු ඉදිරිපත් කල හැකි ය. ඒවා නම්, අප දහවල් කාලයේ ඇවිදින විට තද පැහැති ඇඳුම් භාවිතා කිරීම, භාවිතාකරන ඇඳුම් සොබහවික කපු ඇඳුම් නොවීම, නිවාස වල පිට සහ ඇතුලත බිත්තිවලට තද පාට තීන්ත අලේප කර තිබීම, පොලොවට තද පාට තීන්ත, ටයිල් හෝ ටෙරාසෝ භාවිතාකර තිබීම, දහවල් කාලයේ දී නිවෙස් වල හා කාර්යාල කාමර වල ජනේල වසා තැබීම, භාවිතාකිරීමට තෝරාගෙන ඇති වාහනයේ වර්ණය තද පාට එකක් වීම, .... යනාදිය යි. මේ හේතු නිසා ද ඔබට වැඩිපුර අපහසුතාවයට භාජනය වීමට සිදුවේ.
දැඩි රස්නය නිසා ඇතිවන අපහසුතාවයෙන් සහනයක් ලබාගැනීමට කල හැකි දෑ:
ඔබ දහවල් කාලයේ අව්වේ ඇවිදින විට හෝ දහවල් කාලයේ අව්වේ ඇවිදිමට සිදුවන ගමනක් යාමට සැරසෙන විට, ලා පැහැති ඇඳුම් පමණක් භාවිතාකිරීමට වග බලා ගත යුතු අතර සියලුම ඇඳුම් සියුම් කපු රෙදි වලින් මැසූ ඒවා පමණක් භාවිතා කරන්න. විශේෂයෙන් ම යට ඇඳුම් හා මේස් ආදිය පවා සියුම් කපු ඒවා භාවිතා කරන්න.
ඔබ අව්වේ ගමන් කරන විට කුඩයක් ඉහලාගෙන නොයන්නේ නම් අඩුම තරමින් හිස් වැසුමක්වත් පැළඳීම ඉතා සුදුසු ය. එමෙන්ම නිතර නිතර ජලය පානය කිරීම ද ඉතාමත් යෝග්‍ය ක්‍රියාවකි. තවද නිතර මුහුණ, බෙල්ල හා අත-පය තෙත මාත්තු කිරීම ඉතා සුදුසුය. අව්වේ ගමන් කරන විට දහදිය දමද්දී, එම දහදිය නිතර නිතර ලේන්සු වලින් පිස දැමීම යෝග්‍ය නොවන අතර, ඒවාට සොබහවිකව ම වාෂ්ප වී යාමට ඉඩ දෙන්න. ඒ සඳහා පවන් සලා ගැනීම වඩා යෝග්‍ය ය. එවිට ඔබගේ සම සිසිල් වේ.
බසයක ගමන් කරන විට, ඉර මුදුන්වීමට ප්‍රථම (උදේ සහ සවස ඉර පායා ඇති විට දී) බසය තුලට අව්ව එනවිට දී ජනෙල නො වසන්න. බසයේ ජනේල විවෘතකර තබන්න. නැතහොත් බසය තුල උෂ්ණත්වය ඉහල යනු ඇත. එබැවින් මෙය ගැන හොඳින් සැලකිලිමත්වීම වඩාත් සුදුසු ය. මක් නිසාදයත්, මෙය බොහෝ උගතුන් පවා නොකරන ක්‍රියාවක් බැවින් හා විශේෂයෙන් ම කාන්තාවන් තම හිසකෙස් අවුල් වන නිසා ජනේල වැසීම සාමාන්‍යයෙන් සිදුකරන බැවිනි.
ඔබගේ නිවාස වල පිටත සහ ඇතුලත බිත්තිවලට සුදු හෝ සුදු පැහැයට ආසන්න ලා පාට තීන්ත අලේප කරන්න. පොලොවට භාවිතාකරන තීන්ත, ටයිල් හෝ ටෙරාසෝ සුදු පාට හෝ ලා පාට ඒවා පමණක් භාවිතා කරන්න. ඔබගේ නිවස තවමත් හදමින් පවතින එකක් නම් හා එහි පළමු තට්ටුව නිමකොට ඔබ එහි පදිංචි වී සිටී නම්, නිවසේ වහල වෙනුවට ඇති කොන්ක්‍රීට් තට්ටුව දහවල දී වැඩිපුර රත්වන බැවින්, ඔබට සවස 6 – රාත්‍රී 10 පමණ කාලය තුල නිවස තුල ඉතාමත් අපහසුවක් දැනෙනු ඇත. එයට විසදුමක් විධියට කොන්ක්‍රීට් තට්ටුව ඉහල පැත්තට දිලිසෙන (gloss) රිදී පාට හෝ දිලිසෙන සුදු පාට තීන්ත අලේප කිරීම වඩාත් යෝග්‍ය වේ. නැතහොත් එම සම්පුර්ණ කොන්ක්‍රීට් තට්ටුවම ලා පැහැති ද්‍රව්‍යයකින් වසා තබන්න.
උදේ හෝ හවස ඉර අව්වට භාජනය වන වීදුරු දමා ඇති නිවස්වල ජනේල සියල්ල දහවල් කාලයේ දී විවෘතකර තබන්න වග බලා ගන්න. දහවල් කාලයේ දී විවෘත නොකරන ජනේලවල එළිය පැත්තෙන් දිලිසෙන (gloss) රිදී පාට හෝ දිලිසෙන සුදු පාට තීන්ත අලේප කිරීමෙන් දහවල් කාලයේ දී කාමරයේ උෂ්ණත්වය වැඩි නොවීමට වගබලා ගත හැකි ය.
ඔබ නිදාගැනීමට පැයකට පමණ පෙර නිදන කාමරයට සිසිල් පරිසරයේ වාතය ගලා ඒමට හැකිවන පරිදි එම කාමරයේ ජනේල සියල්ල විවෘතකර තබන්න. (මේ සමඟම කාමරයට මදුරුවන් පැමිණිය හැකි බැවින්, මදුරු කරදරයට විසදුම් ගැනීමට ඔබට සිදුවනු ඇත.) සේද (silk) කොට්ට උර හා ඇඳ ඇතිරිලි ඉවත්කර, ලා පැහැති කපු (cotton) කොට්ට උර හා ලා පැහැති ඇඳ ඇතිරිලි භාවිතා කරන්න. ඔබ පොරවන රෙදි භාවිතා කරන්නේ නම්, ඒවා පැයක් පමණ ශීතකරණයේ තබා භාවිතා කිරීම වඩා සුවදායික නින්දකට මඟ පාදයි.
නින්දට යෑමට ප්‍රථම අනිවාර්යයෙන් සිසිල් වතුරෙන් ඇඟපත සෝදන්න. ඒ සඳහා රාත්‍රී කාලයේ දී ළිඳකින් ගත් වතුර භාවිතාකරන්නේ නම් වඩාත් යෝග්‍යයි. ඉන්පසු විදුලි පංකා භාවිතා කිරීම ඉතාමත් ම කාර්යක්ෂම වේ. පිටාර විදුලි පංකා (exhaust fans) නිදන කාමර සඳහා භාවිතා කිරීම ඉතා සුදුසුය. ඒවා ඔබ නිදාගැනීමට පැය භාගයකට පමණ පෙර ක්‍රියා කරවන්න. වායු සමීකරණ යන්ත්‍ර භාවිතය ඉතා සුදුසු ක්‍රියාවක් වුවත්, එමගින් ඔබගේ විදුලි බිල සඳහා කරනු ලබන දායකත්වය ඉතා ඉහල බව ද සිහිපත් කරමි.
නමුත් ඔබ විදුලි පංකා භාවිතා නොකරන්නේ නම් තරමක් උණුසුම් වතුර භාවිතාකොට ඇඟපත සෝදා පිහිදා ඉන්පසු ටික වෙලාවකින් ඇඳට යන්න. නින්දට යාමේදී අඳින ඇදුම් සියල්ල වෙනුවට ඝනකම නැති හෙවත් සියුම් කපු ඇඳුම් පමණක් භාවිතා කරන්න. ඔබගේ රාත්‍රී ඇඳුම්, නිදා ගැනීමට පෙර පැය භාගයක් පමණ ශීතකරණයේ තබා භාවිතා කිරීම ද තවත් සාර්ථක ක්‍රමයකි.
ඔබ නිදාගන්නා විටදී ඔබගේ සමට-සම ස්පර්ශය හැකිතරම් අඩු කරන ඉරියව් නිදාගැනීමට භාවිතා කරන්න. එසේ නැතහොත් ඔබගේ එම ස්පර්ශ ප්‍රදේශ වලට නැවත නැවතත් දහදිය දමන බැවින් ඔබ නැවත නැවතත් ඇහැරෙනු ඇත. ඔබගේ බෙල්ල, කිහිළි ප්‍රදේශ හා ඉකිළි ප්‍රදේශ සිසිල් වතුරෙන් පොඟවන ලද කපු තුවායකින් නිතර පිහිදා ගැනීම වඩාත් සුදුසු වේ. එමෙන්ම නිදා ගැනීමේ දී එම ප්‍රදේශ වලට හුළං වදින ආකාරයට ඒවා තබා ගැනීම වඩාත් යෝග්‍ය වේ.
වාහනයක් මිලදී ගන්නා විටදී ලා පැහැයකින් යුත් වාහන පමණක් තොරාගන්න. ඇතුලත භාවිතා කරන සියලුම අසුන් කවර හා ඇතුලත නිමැවුම් ද්‍රව්‍ය ලා පාට වීම වඩාත් සුදුසු ය. තවද වාහනය නවතන විට දී හැකි හැමවිට ම සෙවන දෙන ගහක් යට නවත්වන්න උත්සහ කරන්න. අඩුම තරමින් සෙවන සහිත ස්ථානයක නැවැත්වීම වඩා යෝග්‍ය වේ. එසේ නවතා තැබූ වාහනයෙන් නැවත ගමන් කිරීමට පෙර වාහනයේ දොරවල් සියල්ල සිසිල් වාතය රථය තුලට ඒමට හැකිවන පරිදි, විනාඩි 05 ක් පමණ විවෘතකර තබන්න, ඉන්පසු වාහනය පණගන්වා වායු සමීකරණ යන්ත්‍රය ක්‍රියා කරවන්න.
මෙලෙස ඔබට බොහෝ සාධක හා උපදෙස් ඉදිරිපත් කල හැකි ය. ඉන් ප්‍රධානත ම හා වැදගත් ම ඒවා යයි මට හැඟෙන ඒවා පමණක් ඔබ වෙත ඉදිරිපත් කලෙමි. අවසාන වශයෙන්, ඔබට සුවදායක ජීවිතයක් පතමි!
විදුසර 2016 මැයි 04, අද 2016 මැයි 03 සහ දිවයින 2016 මැයි 06 පලවූ ලිපියකි !
ආචාර්ය ප්‍රසන්න මධුරංග ප්‍රනාන්දු
ජ්‍යෙෂ්ඨ කථිකාචාර්ය,
භෞතික විද්‍යා අධ්‍යයනාංශය,
ශ්‍රී ජයවර්ධනපුර විශ්වවිද්‍යාලය.